مزاد النصب
انا مقتنع ان الشعب المصري نصه نصابين ونصه التاني ناس اتنصب عليهم و الحمد لله انا واغلب صحابي من النص المنصوب عليه.
لازم كل مصري في حياته يكون له قصة مع النصب من اول الصنايعي الي ضحك عليه واخد فلوس كتير لحد شركات توظيف الاموال الي بتاخد بالكوم وتسافر لبرة
بمناسبة النصب احكيلكم حدوتة ظريفة مع النصب حصلت مع واحد صاحبي
مرة انا وواحد صاحبي ماشيين في اسكندرية في محطة الرمل مش فاكر كان يومها عيد ولا ايه , كان سننا صغير يمكن لسه في الثانوي تقريبا او في اوائل سنين الجامعة , كنا عند السنترال الي ناحية المنشية كده , لقينا راجل واقف على كوم حاجات وعمال يقول قرب قرب قرب , قرب قرب قرب , موبايل سامسونك بعشرين جِني , موبايل نوكيا بـ 40 جِني , مع العلم ان الوقت ده كانت الموبايلات لسه نازله ومكنش فيه حاجة اسمها موبايلات ملونة او نغمات بلوفونيك او نص بلوفونيك حتى , في دقيقة بتاع 10 رجالة اتلموا حوالين الراجل وراح صاحبي قالي تعالى معايا 60 جنيه اجيب موبايل , انا طبعا من عادتي عدم التسرع واخذ الامور بعقلانية شوية فماقتنعتش اني افكر اشتري موبايل بالطريقة دي , المهم صاحبي وقف في المزاد وانا واقف جنبه بس بعيد شوية ,يلا يلا يلا معايا قزازة برفان وطقم كوبايات بـ 20 جنيه اشتريهم وخد الموبايل الموتورلا ده معاهم ,فواحد يقوله هشتري يروح صاحب المزاد مديله البرفان والكوبايات بس ومش بيديله الموبايل, بعدين يلا يلا يلا اشتري مزيل العرق الجامد ده و وطقم اطباق بـ 30 جنيه وخد عليهم الموبايل وكل ما تشتري اكتر فرصتك انك تاخد الموبايل تكبر , راح واحد تاني شاري
المهم شوية بشوية صاحبي كل شوية يشتري هو كمان لحد ما اشترى حاجات متخلفة بفوق الـ 50 جنيه , في الاخر خالص الراجل قال دلوقتي مزاد على الموبايل السينمز نبدأ بـ 50 مين يزود هوبا 100 مين يزود هوبا واحد قال 150 مين يزود لحد ما واحد قال 300 ألا أونه ألا دو ألا ترى، راح الراجل في ثانية اداله الموبايل وفي ثانية المولد كله اتفض
طبعا الراجل الي اخد الموبايل شغال معاه وكان واضح جدا انه اخد الموبايل وراح حاطه في جيبه وراح ماشي وطبعا طول ماهو واقف ما اشتراش اي حاجة
الحاجة التانية كل الناس الي اشترت شكلها هي برضه معاه لاما ناس متخلفيش لانها مثلا ما حستش انها انضحك عليها ولا مثلا وقفوا قالوا ايه الي بيحصل ده ولا قالوا اي بتنجان
مشيوا في ثانية برضه
المهم صاحبي اخد الحاجات الي هي مزيل عرق برائحة العرق , وعلبة جيل من الي هي بتنباع بجنيه ونص في المحلات الي العيال بيجيبوها بس مش علشان يثبتوا شعرهم علشان يضربوا بيها عشرة , وجهاز كده مش فاكر كان بيجي زيه في التلفزون زمان الي هو بيقشر البطاطس والخيار والبتنجان والحاجات دي طبعا الجهاز ده اترمى في الزبالة علشان مكنش بيعمل اي بطيخ.
احلى حاجة في كون انك اتنصب عليك , انك بتاخد بالك بعد كده , ولما يتنصب عليك في الاول في حاجة صغيرة بيبقى احسن لما يتنصب عليك لما تكبر في حاجة كبيرة
